التحرش

همممممم … نبدأ منين؟

من ان لبس البنات هو اللى بيخلي الرجالة يفقدوا السيطره … و لا ان الرجاله فاقدين السيطره اصلا و مش محتاجين لبس ضيق ولا حاجه

طيب بالنسبة للبس، صحيح فى بنات بتلبس ضيق و اللى بيضايقنى غير الضيق هو الكلام اللى مكتوب على الهدوم و اللى اغلب البنات ما بتبقاش عارفه معناه و الحبة التانين بيبقوا عارفين .. كلام من نوعية

Touch me right there!

KISS ME!

I’m Waiting

This is for you

I am yours

و هكذا، يعني دي بقى دعوة عامة صريحه لكل راجل ربنا كارمه شويه و بيعرف انجليزي و مقضيها على التركيه الفضائيه و فاقد السيطرة تماما

طيب و الستات اللى بيكونوا لابسين واسع و حشمه و كمان نقاب، طب دول الرجاله بيتحرشوا بيهم ليه بقى؟ اهو ولا باين حاجه من جسمهن ولا عاملين دعوة عامة!

يكونش عشان ان فى نوع من الستات بيلبس النقاب و الحجاب و الذي منه عشان بس يداروا قدام اهلهم

طب يا سيدي لو مره جربت مع واحده محجبة و جات معاك فا مش كل الحجبات كده، الله هيا مش امك محجبة ولا ايه؟

خلاص البنات وحشة و بقوا كلهم فاجرين و عينيهم يندب فيهم رصاصتين، طب بتزعل ليه بقى لما تعرف ان اختك اتعاكست … ماهي ممكن تكون بريئة معاك فى البيت و بتلبس حشمة قدامك بس لامؤاخذة بتنزل مع اى صفارة

الرك يا دكر على اللى انت بتعمله، و اللى عنيك بتشوفه فى الستات … لو انت شايف الست شويه حاجات يتبص عليها او تلمسها … لو انت شايف الست مباحة تبقى اختك مباحة و امك مباحة و مراتك مباحة و بنتك مباااااااحه

حتى لو انت معرفتش … ماهو اصلك مش سوبر مان هايعرف كل حاجه بتحص،اللى بتعمله فى الستات الغربية عنك واحد دكر زيك كده هايعمله فى ستاتك

بس العيب مش بس فى البنات … ما تفتحوا كده اتفرجوا على صور اهاليكوا كانت عامله ازاى زمان .. افتحي صور امك و شوي كانت بتلبس ايه قبل ما تفكري ان لبسك هو المشكله

اسألى امك او خالتك او عمتك كان فى تحرش زمان ولا لأ … العيب مش فى لاستات بس العيب فى الرجالة اللى للأسف مش رجالة … كل اللى خادوه من الرجولة هو هيئة و شكل الراجل.

احكيلكوا حدوتة … حدوتة بنت بريئة

اتحرش بيها واحد دكر كده فى يوم كانت لابسة تونك طويل على بنطلون … افتكرت زي اغلب الناس ا بيقولوا ان المشكله فى اللبس و ان هيا بلبسها قدمت دعوة مفتوحة للدكر ده انه يلمسها

غيرت اسلوب لبسها و لبست عبايات و اسدال … برضه دكر تانى اتحرش بيها

تعمل يه؟ الله يعني مش باللبس اهو

قررت ترجع تانى لاسلوب لبسها و حياتها بعد ما اتأكدت ان العيب مش منها

بعد كمان ما شافت عربيات بتقف و تعاكس ست منقبة!

الله … هيا الرجالة جرالها ايه، انت لو مراتك منقبة و طلعت هيا اللى انت بتعاكسها و  لله دي تعمل معاك احلى شغل و ساعتها هاتعرف ان الله حق

نرجع للى كنا بنقوله، العيب فى الستات و لا فى الرجالة اللى فاقدة السيطره … طيب بمناسبة الرجاله بلاش نقول اصل الحاله الاقتصادية و مش عارفين يتجوزوا و البقين الحامضين دول … عشان برضه من زمان و فى ازمه فى الفلوس و السكن بس دلوقتى زاد عليهم ازمة الاخلاق

السؤال الذي طارح نفسه من حبه حلوين

كيف تحمي النساء انفسهن من الرجال فاقدين السيطره؟

كيف يحمي الرجال الذين اوشوكوا على فقدان السيطره انفسهم من النساء ذوات الدعوات العامة المفتوحه؟

DEADLOCK!