وقال لك ايه بأه فى الحواديت؟
قال لك من اول ما تقول واء واء
هنبلسها حزام العفة
ونفهمها اننا ماسكنها
ولو سيبناها راح تخربها
ده شرف أب وأخ يا ناس
لو ضاع منا
ايه هيبقى لنا
أما راجلنا اسم الله عليه
اسمه شَريف
يسكر، يزنى، يسرق، يقتل
برضه شريف
يفتح كباريه، بيت دين يقفل
برضه شريف
ياخد رشوة، يِقَّلب نشوى
ياخوانا شريف
الله مش جلدته متصانة
و قال لك ايه بأه فى الحواديت؟
شرف البنت ده زى الساعة
مايأخرش مايقدمش
عود كبريت يا واد يا شفاعة
مايفكرش مايهزرش
وشفاعة عجبته بنت جماعة
أهى معروف عنها الطاعة
للعين والرمش
بس البت ضعفت ساعة
مع واد جحش
وراح شرفها فى البلاعة
مترددش
قامت راحت لابو سماعة
اللى عليها متأخرش
ركب جلدة يا خوانا فى ساعة
جديدة بقرش
وشرف البنت بقى ولاعة
مابتخلصش
قال لك ايه بأه فى الحواديت؟
قال الراجل ده فاكر ان الجلدة دى صيت
حط عليها حراس وعبيد
لجل ما شرفه يبأه حديد
ونسى يعلم بنته الشرف
اللى بجد
أنه فى اخلاق مش فى أَرَف
جوا القد
فبنته طلعت أنصح منه
وده بجد
حطط رقعه
خوفا منه
عشان يتسد
والأخلاق عندها وعنده
بيت واتهد
فين كرامتنا
فين عزتنا
فين حرمتنا
فين كلمتنا
فين امانتنا
فين مكانتنا
فين الرد؟
الرائعه :أمـــل مــحمــود
No comments:
Post a Comment